Goditet grupi pas ngjarjes në shkollë, zbardhet skema dhe rolet e përfshirjes

Policia e Lezhës ka finalizuar operacionin e koduar “Pajisjet”, duke zbardhur autorësinë dhe rrethanat e një ngjarjeje të ndodhur 4 ditë më parë në shkollën 9-vjeçare “Besëlidhja”.

Si rezultat i hetimeve, janë identifikuar 6 persona që pas mesnate hynë në ambientet e shkollës, morën 19 pajisje dhe dëmtuan dyert e objektit. Një 22-vjeçar është vënë në pranga, ndërsa 5 të tjerë, të mitur të moshave 15-17 vjeç, janë proceduar penalisht. Sipas Policisë, tre prej të miturve janë nxënës të kësaj shkolle dhe dyshohet se janë nxitur nga 22-vjeçari për kryerjen e veprimit.

Ngjarja është konstatuar pasditen e datës 15 mars 2026, kur u raportua se nga shkolla ishin marrë 16 laptopë, 2 videoprojektorë dhe serveri qendror i kamerave të sigurisë, si dhe ishin dëmtuar disa dyer.

Nga hetimet rezulton se rreth orës 01:00 të datës 14 mars 2026, grupi ka hyrë në ambientet e shkollës, ka dëmtuar dyer dhe ka marrë pajisjet elektronike. Më pas, ato janë transportuar me automjetin e 22-vjeçarit dhe janë fshehur në bodrumin e një objekti në ndërtim, si dhe në banesën e tij.

Gjatë operacionit, Policia ka gjetur dhe sekuestruar 16 prej pajisjeve të marra, përfshirë laptopë, videoprojektorë dhe serverin, si dhe automjetin tip “Volkswagen” që dyshohet se është përdorur për transportin e tyre.

Materialet procedurale i janë referuar Prokurorisë së Lezhës për veprime të mëtejshme.

Lezhë/Finalizohet operacioni i koduar “Pajisjet”. Zbardhen autorësia dhe rrethanat e vjedhjes së konstatuar 4 ditë më parë, në shkollën “Besëlidhja”

Identifikohen 6 shtetasit që hynë pas mesnate, në ambientet e shkollës, vodhën 19 pajisje dhe dëmtuan dyert e shkollës.

5 prej tyre, shtetas të mitur, u proceduan penalisht, ndërsa bashkautori, 22 vjeç, u vu në pranga.

Gjenden 16 prej pajisjeve të vjedhura (laptopë, videoprojektorë dhe server), të fshehura në një objekt në ndërtim dhe në banesën e të arrestuarit.

Si rezultat i veprimeve hetimore profesionale të kryera menjëherë pas njoftimit, pasditen e datës 15.03.2026, se në shkollën 9-vjeçare “Besëlidhja”, Lezhë, ishin vjedhur 16 laptopë, 2 videoprojektorë dhe serveri qendror i kamerave të sigurisë, si dhe ishin dëmtuar dyer të objektit, shërbimet e Komisariatit të Policisë Lezhë mundësuan kapjen e autorëve dhe sqarimin e rrethanave të rastit.

Në vijim, në kuadër të operacionit të koduar “Pajisjet”, u vu në pranga shtetasi A. B., 22 vjeç, si dhe u proceduan penalisht 5 të mitur të moshave 15-17 vjeç (3 prej tyre, nxënës në këtë shkollë), të cilët dyshohet se janë nxitur nga 22-vjeçari, për kryerjen e këtij krimi.

6 shtetasit dyshohet se rreth orës 01:00 të datës 14.03.2026, kanë hyrë në ambientet e shkollës “Besëlidhja”, kanë dëmtuar dyer e objektit, si dhe kanë vjedhur 16 laptopë, 2 videoprojektorë dhe serverin qendror të kamerave të sigurisë.

Më pas, 6 shtetasit kanë transportuar pajisjet, me automjetin e të arrestuarit, dhe i kanë fshehur ato, në bodrumin e një pallati aktualisht në ndërtim dhe në banesën e 22-vjeçarit. 16 prej pajisjeve të vjedhura u gjetën dhe u sekuestruan me cilësinë e provës materiale, së bashku me automjetin tip “Volkswagen”, me të cilin u transportuan.

Materialet procedurale iu referuan Prokurorisë Lezhë, për veprime të mëtejshme.