SHBA dhe Kina arrijnë konsensus paraprak për tarifat, nisin hapat për marrëveshje të re tregtare

Përmes këtij raundi të bisedimeve ekonomike e tregtare midis Kinës dhe Shteteve të Bashkuara, të dyja palët arritën konsensus paraprak për disa çështje, tha Li Chenggang, përfaqësues i tregtisë ndërkombëtare i Kinës dhe njëherësh zv/Ministri i Tregtisë.

Li deklaroi në një konferencë shtypi të hënën se të dyja palët zhvilluan shkëmbime të thelluara, të sinqerta dhe konstruktive, gjatë një dite e gjysmë të fundit, si dhe do të vijojnë procesin e konsultimeve.

Ai tha se diskutimet mbuluan tema duke përfshirë nivelet e tarifave dypalëshe në rrethanat e reja, si dhe zgjatjen e mundshme të tarifave ekzistuese apo masat përkatëse jotarifore. Pala amerikane informoi Kinën për rregullimet e saj të fundit të tarifave dhe konsideratat e ardhshme, ndërsa Kina shprehu shqetësimin për pasigurinë e mundshme të sjellë nga këto rregullime, tha ai.

Li tha se të dyja palët ranë dakord të punojnë së bashku për të ruajtur stabilitetin e marrëdhënieve dypalëshe ekonomike e tregtare dhe diskutuan idenë e krijimit të një mekanizmi pune dypalësh për të promovuar bashkëpunimin në tregti dhe investime.

Lidhur me kufizimet e ShBA-së në tregtinë dhe investimet kineze, veçanërisht fillimin e fundit të dy hetimeve të seksionit 301 që përfshijnë Kinën, Li theksoi se qëndrimi i Kinës ka qenë i qëndrueshëm dhe se ajo kundërshton hetime të tilla të njëanshme.

Ai shtoi se Kina do të ndjekë me vëmendje zhvillimin e këtyre hetimeve dhe do të marrë masa në kohë për të mbrojtur të drejtat dhe interesat e saj ligjore.

Ai shprehu shpresën se pala amerikane do të mbajë angazhimet e saj dhe do të punojë së bashku me Kinën për të krijuar një marrëdhënie tregtare e ekonomike afatgjatë dhe të qëndrueshme Kinë-ShBA.

Li gjithashtu tha se të dyja palët ranë dakord se marrëdhëniet e qëndrueshme dypalëshe ekonomike e tregtare favorizojnë jo vetëm Kinën dhe Shtetet e Bashkuara, por edhe mbarë botën.