ZVICËR – Të martën, më 17 mars, do të përcaktohen katër skuadrat e para që do të kualifikohen në fazën çerekfinale të UEFA Champions League. Tre prej ndeshjeve do të luhen, si zakonisht, duke nisur nga ora 21:00.

Ndeshjet e kthimit të fazës së 1/8-ve premtojnë spektakël dhe rivalitet të fortë. Padyshim, interesin më të madh e tërheq përballja mes Manchester City dhe Real Madrid.

Skuadra spanjolle ka fituar takimin e parë në Madrid me rezultatin 3-0, duke hedhur një hap të sigurt drejt kualifikimit. Megjithatë, te Manchester City nuk janë dorëzuar dhe besojnë te një përmbysje e madhe, veçanërisht me mbështetjen e tifozëve vendas.

Një tjetër përballje interesante pritet të jetë ajo mes Chelsea dhe Paris Saint-Germain. Francezët fituan ndeshjen e parë me rezultatin 5-2, por londinezët synojnë të përmbysin disavantazhin, ndonëse kjo paraqitet si një mision mjaft i vështirë.

Sfiduese pritet të jetë edhe ndeshja për Arsenal, që pret në shtëpi Bayer Leverkusen. Takimi i parë në Gjermani u mbyll në barazim 1-1, me londinezët që shmangën humbjen në minutat e fundit falë një penalltie të diskutueshme.

Ndërkohë, ndeshja tjetër është ajo mes Sporting CP dhe Bodø/Glimt, e cila do të nisë në orën 18:45. Në takimin e parë, skuadra norvegjeze triumfoi me rezultatin 3-0.