Lezhë / Zbardhet ngjarja, arrestohet autori i dyshuar pas operacionit “Zoomed In”

Një operacion i zhvilluar nga Policia e Lezhës ka çuar në zbardhjen e një ngjarjeje të ndodhur dy ditë më parë në lagjen “Besëlidhja”, ku u dëmtua me lëndë plasëse automjeti i një punonjësi policie.

Policia e Lezhës deklaroi sot se ka zbardhur autorësinë dhe rrethanat e ngjarjes së ndodhur 2 ditë më parë në lagjen “Besëlidhja”, ku u shkatërrua me eksploziv automjeti i punonjësit të policisë Gent Gjetja.

Si rezultat i hetimeve intensive dhe analizës së pamjeve filmike nga disa akse rrugore, është identifikuar dhe arrestuar autori i dyshuar, shtetasi Fatjon Rrika, 32 vjeç, i cili rezulton me precedent në Itali për vjedhje me armë.

32-vjeçari u kap në fshatin Zhejë të Kurbinit, ndërsa lëvizte me ciklomotorin që dyshohet se është përdorur për të shkuar në vendngjarje ditën e incidentit.

Gjatë kontrollit në banesën e tij, policia gjeti një armë gjahu pa leje, për të cilën nisi procedimi penal ndaj babait të tij, shtetasit N. Rr., 66 vjeç. Ciklomotori dhe arma u sekuestruan si prova materiale.

Hetimet vijojnë për identifikimin e një personi tjetër që dyshohet të ketë bashkëpunuar në këtë ngjarje, ndërsa materialet i janë referuar Prokurorisë së Lezhës për veprime të mëtejshme. /noa.al