Kreu i Partisë Demokratike, Sali Berisha, ka reaguar ashpër ndaj deklaratave të ambasadorit të Bashkimit Europian në Tiranë, Gonzato, i cili sipas Berishës, ka cilësuar Agjencinë Kombëtare për Shoqëri Informacioni (AKSHI) si një “problem kulturor” për shqiptarët.

Berisha e ka konsideruar këtë deklaratë si një fyerje të rëndë ndaj shqiptarëve, duke theksuar se problemi nuk është i qytetarëve, por i strukturave të përqendruara rreth qeverisë dhe interesave personale të kryeministrit Edi Rama. Ai theksoi se AKSHI nuk reflekton kulturën e shqiptarëve, por problemet që lidhen me menaxhimin e tij nga persona të afërt të Ramës.

“Kjo është një dezinformim dhe shërbim i keq për shqiptarët. Shqipëria ka dhjetëra ndërmarrje dhe institucione që mund të menaxhojnë fushën dixhitale, problemet janë vetëm politike dhe të lidhura me rrethin e ngushtë të kryeministrit,” deklaroi Berisha.

Ai bëri thirrje që vendet anëtare të BE-së të dërgojnë misione faktmbledhëse, për të vlerësuar situatën në mënyrë të pavarur dhe për të shmangur keqinterpretimet që cenojnë imazhin e vendit.

Berisha e përmbylli reagimin duke theksuar se pengmarrja është politike dhe jo një kulturë shqiptare, duke e cilësuar deklaratën e Gonzatos si një ndërhyrje të padrejtë dhe të papranueshme në çështjet kombëtare.