Përdorimi i armëve lazer në mbrojtjen ajrore po kalon nga faza eksperimentale në përdorim praktik, veçanërisht për neutralizimin e dronëve. Këto sisteme konsiderohen nga ekspertët si një alternativë më e saktë dhe me më pak rrezik dëmesh anësore krahasuar me raketat apo armët tradicionale kundërajrore.

Një incident i ndodhur më 10 shkurt në El Paso, në shtetin e Texas, tregoi njëkohësisht potencialin dhe rreziqet e kësaj teknologjie. Hapësira ajrore mbi qytet u mbyll papritur pasi një patrullë kufitare amerikane qëlloi me një armë lazer ndaj një objekti fluturues, i cili më vonë rezultoi të ishte një balonë feste. Si pasojë e incidentit, autoritetet amerikane të aviacionit pezulluan fluturimet në zonë për rreth tetë orë.

Prodhuesit e këtyre sistemeve theksojnë se armët lazer kanë avantazhin e minimizimit të dëmeve anësore, pasi nuk përdorin municione që mund të devijojnë nga kursi. Megjithatë, ekspertët paralajmërojnë se rrezja e fuqishme lazer mund të paraqesë rrezik për avionët civilë edhe në distancë nga objekti i synuar.

Sipas Jamey Jacob, profesor i inxhinierisë aerohapësinore në Oklahoma State University, shfaqja e armëve lazer në fushëbetejën moderne do të nxisë zhvillime të reja në dizajnin e dronëve sulmues. Këto mund të përfshijnë materiale rezistente ndaj nxehtësisë ose mekanizma që rrotullojnë trupin e dronit për të shmangur përqendrimin e energjisë lazer në një pikë të vetme.

“Është një lojë si macja me miun,” tha Jacob për Radio Free Europe/Radio Liberty. “Sapo krijohet një mbrojtje efektive kundër një kërcënimi, shfaqet një variant i ri i tij. Kjo është natyra e luftës moderne.”