Kryeministri Edi Rama deklaroi se qeveria do të finalizojë krijimin e një faktori shtetëror që do të ketë ndikim në tregun e brendshëm të naftës, me qëllim stabilizimin e çmimeve dhe rritjen e transparencës.

Sipas tij, ky mekanizëm do të luajë rolin e stabilizuesit në treg, duke ndikuar në transparencën e çmimit dhe duke garantuar furnizimin e tregut. Rama theksoi se kjo nismë do të mbështetet nga një kapacitet i rëndësishëm financiar, siç është garancia sovrane.

“Jemi sot, edhe për shkak të kushteve të kësaj krize të papritur, në momentin kur do të finalizojmë krijimin e një faktori shtetëror me impakt në tregun e brendshëm të naftës, i cili do të luajë rolin e stabilizuesit të tregut, do të ndikojë në rritjen e transparencës së çmimit dhe do të garantojë furnizimin në treg, duke pasur në mbështetje një kapacitet të rëndësishëm siç është garancia sovrane,” u shpreh Rama.

Ai shtoi se kjo nismë pritet të jetë një moment kthese për tregun e naftës në vend.

“Besoj shumë se ky do të jetë një moment kthese për të përmbushur një tjetër zotim të marrë me nisjen e mandatit të katërt, që nafta që tregtohet në Shqipëri të jetë një produkt në një nivel që nuk ndikohet kaq fort nga luhatjet në tregjet ndërkombëtare,” tha kryeministri.