TIRANË – Parlamenti është rrethuar me gardh metalik mbrëmjen e së enjtes, në prag të protestës së paralajmëruar nga opozita për ditën e nesërme. Nga pamjet e siguruara shihet se rrethimi është shoqëruar edhe me zhvendosjen e makinave të parkuara në zonën përreth ndërtesës.

Policia e Tiranës ka bërë të ditur planin e masave për tubimin. Sipas njoftimit, nga ora 06:00 deri në përfundim të protestës, do të kufizohet qarkullimi i automjeteve në rrugën “George W. Bush”.

Gjithashtu, Policia paralajmëron se, në varësi të zhvillimit të tubimit, mund të ketë kufizime të përkohshme edhe në akset e tjera rrugore, ndërsa trafiku do të devijohet në rrugë alternative për të lehtësuar lëvizjen e qytetarëve.

Forcat e rendit bëjnë apel për mirëkuptimin e qytetarëve dhe u kërkojnë që të shmangin përplasjet me situata që mund të cenojnë rendin dhe sigurinë publike.

Gardhi metalik dhe masat e tjera synojnë të sigurojnë rendin gjatë protestës, duke garantuar edhe qarkullimin e sigurt të qytetarëve dhe automjeteve në zonat përreth.