Tiranë – Partia Socialiste e Shqipërisë ka refuzuar kërkesën për heqjen e imunitetit të zëvendëskryeministres dhe ministres së Infrastrukturës dhe Energjisë, Belinda Balluku. Lidhur me këtë çështje reagoi sekretari i përgjithshëm i PS-së, Blendi Klosi, gjatë një konference për mediat.

Klosi theksoi se Partia Socialiste mbetet e angazhuar në mbështetje të reformës në drejtësi dhe institucioneve të reja të drejtësisë, duke shtuar se mazhoranca nuk ndërhyn në proceset hetimore.

“Partia Socialiste e ka shprehur qartë qëndrimin e saj dhe nuk kemi asnjë diskutim sa i përket drejtësisë së re. Mbështetja jonë ka qenë që në fillim. Në pushtet kemi ardhur me një nga premtimet e mëdha, reformën në drejtësi, dhe vazhdojmë ta mbështesim duke qëndruar të baraslarguar”, u shpreh Klosi.

Ai shtoi se mazhoranca i qëndron parimit të mosndërhyrjes në punën e institucioneve të drejtësisë dhe se nuk do të pengojë asnjë proces hetimor.

“Ne i qëndrojmë 100 për qind parimit se nuk involvohemi në asnjë proces hetimor. Nuk do të ketë pengim të hetimeve”, deklaroi Blendi Klosi.