TEHERAN – Media shtetërore iraniane raportojnë se Irani ka ndërmarrë një seri sulmesh me raketa ndaj disa bazave ushtarake amerikane në Lindjen e Mesme, duke e cilësuar operacionin si një nga më të rëndët që nga nisja e luftës në rajon.

Sipas një deklarate të publikuar nga Trupat e Gardës Revolucionare Islamike në rrjetin social X, objektiv i sulmeve kanë qenë baza ajrore Al Udeid në Katar, Kampi Arifjan në Kuvajt dhe baza Harir në Irak.

Raportimet e mediave shtetërore iraniane bëjnë me dije se “lançimi masiv” i raketave ka shënjestruar gjithashtu edhe Flotën e Pestë Detare të Shteteve të Bashkuara në rajon, duke pretenduar se është goditur infrastruktura operacionale e ushtrisë amerikane.

Në një tjetër reagim të shpërndarë nga burime zyrtare iraniane, operacioni është cilësuar si “më shkatërruesi dhe më i rëndi” që nga fillimi i konfliktit.

Deri në këto momente, zyrtarët amerikanë nuk kanë bërë ende një koment zyrtar lidhur me pretendimet për sulmet.