Tre punonjëse të një shkolle 9-vjeçare në Vlorë janë vënë nën hetim nga policia pas një kallëzimi të bërë nga nëna e një nxënësi. Bëhet fjalë për një mësuese, një psikologe dhe një oficere sigurie, të cilat dyshohen për veprën penale “shpërdorim detyre”.

Sipas informacioneve zyrtare, nëna e nxënësit ka denoncuar se punonjëset e institucionit arsimor nuk kanë ndërhyrë për të parandaluar dhe menaxhuar një konflikt që ka ndodhur brenda ambienteve të shkollës, ku është përfshirë djali i saj së bashku me disa bashkëmoshatarë.

Policia bën me dije se specialistët për Hetimin e Krimeve Ekonomike-Financiare në Drejtorinë Vendore të Policisë Vlorë kanë referuar materialet në Prokurori, e cila ka nisur procedimin penal ndaj shtetaseve E. H., 56 vjeçe, O. Zh., 42 vjeçe dhe A. I., 42 vjeçe, që ushtronin përkatësisht detyrën e mësueses, psikologes dhe oficeres së sigurisë në shkollën publike.

Sipas njoftimit të policisë, hetimet janë në vijim për të sqaruar plotësisht rrethanat e konfliktit dhe përgjegjësinë e mundshme të punonjëseve të institucionit arsimor në menaxhimin e situatës.

Njoftimi:

“Specialistët për Hetimin e Krimeve Ekonomike-Financiare në DVP Vlorë referuan materialet në Prokurori, ku nisi procedimi penal, për veprën “Shpërdorimi i detyrës”, për shtetaset E. H., 56 vjeçe, O. Zh., 42 vjeçe dhe A. I., 42 vjeçe, përkatësisht mësuese, psikologe dhe oficere sigurie, në një shkollë publike 9-vjeçare, pasi ka kallëzuar nëna e një nxënësi, se këto shtetase nuk kanë ndërhyrë për parandalimin dhe administrimin e një konflikti në shkollë, në të cilin janë përfshirë djali i saj dhe bashkëmoshatarë të tij.“, thuhet në njoftimin e policisë.