Rrjeti rrugor në vend është pakësuar me rreth 181 kilometra në periudhën 2014–2024, kryesisht si pasojë e riklasifikimit të inventarit rrugor dhe amortizimit të lartë të disa segmenteve në zonat rurale. Të dhënat bëhen të ditura nga Instituti i Statistikave i Shqipërisë.

Sipas statistikave zyrtare, qarku me rritjen më të madhe të gjatësisë së rrugëve është Shkodra. Në këtë qark, rrjeti rrugor është zgjeruar me 54.1 kilometra, ose rreth 13% më shumë krahasuar me vitin 2014. Rritja lidhet kryesisht me ndërtimin e rrugës së re drejt Thethit dhe aksit Tamarë–Vermosh.

Në të njëjtën prirje pozitive renditet edhe Vlora, ku gjatësia e rrugëve është shtuar me 50.4 kilometra, ose rreth 12%. Kjo rritje i atribuohet ndërtimit të Bypass-it të Vlorës dhe zhvillimit të rrugës së Lumit të Vlorës.

Ndërkohë, zgjerim të rrjetit rrugor kanë shënuar edhe Elbasani dhe Korça. Në Elbasan, gjatësia e rrugëve është rritur me 32.5 kilometra (+9%), ndërsa në Korçë me 24.7 kilometra (+7%).

Këto qarqe konsiderohen ndër përfituesit kryesorë të investimeve në infrastrukturë gjatë dekadës së fundit.

Në anën tjetër, shumica e bashkive në vend kanë shënuar tkurrje të gjatësisë së rrjetit rrugor. Reduktimin më të madh në vlerë absolute e regjistron Tirana, me 68.6 kilometra më pak rrugë (-22%) në periudhën 2014–2024.

Rënie të ndjeshme kanë shënuar edhe Fieri me 68.2 kilometra më pak (-19%), Lezha me 59.9 kilometra (-19%), Kukësi me 50.1 kilometra (-13%), Durrësi me 36.5 kilometra (-20%) dhe Dibra me 39.7 kilometra (-14%). Edhe Berati ka pësuar tkurrje me 17.9 kilometra (-10%), ndërsa Gjirokastra ka regjistruar një rënie më të lehtë prej 2.5 kilometrash (-1%).

Rënia e gjatësisë së rrjetit rrugor në disa bashki duket paradoksale, veçanërisht në një periudhë kur në infrastrukturë janë investuar miliarda euro nga Ministria e Infrastrukturës dhe Energjisë e Shqipërisë dhe Fondi Shqiptar i Zhvillimit.

Megjithatë, ekspertët theksojnë se një pjesë e madhe e investimeve gjatë dekadës së fundit nuk janë përdorur për hapjen e kilometrave të rinj të rrugëve, por për rindërtimin, zgjerimin dhe modernizimin e rrugëve ekzistuese.

Një tjetër faktor lidhet me procesin e përditësimit të inventarit pas reformës territoriale dhe verifikimeve të kryera vitet e fundit. Në shumë raste, bashkitë kanë hequr nga regjistrat segmente që nuk konsiderohen më rrugë funksionale, duke riklasifikuar rrugë rurale të amortizuara ose me përdorim të kufizuar, citon Monitor.

Ndryshimet në ndarjen e kompetencave ndërmjet pushtetit vendor dhe institucioneve qendrore kanë ndikuar gjithashtu në këto statistika. Si pasojë, një pjesë e reduktimeve të raportuara lidhen me përditësimin e inventarit, riklasifikimin e segmenteve rrugore dhe ndryshimet në metodologjinë e matjes.