Raporti vjetor i SPAK për vitin 2025 tregon një rritje të ndjeshme të aktivitetit ndaj korrupsionit të nivelit të lartë dhe krimit të organizuar. Struktura e Posaçme ka arritur rezultate rekord, duke sekuestruar pasuri me vlerë totale 45.4 milionë euro dhe duke hetuar figura të larta politike dhe zyrtarë të rëndësishëm.

Pjesa dërrmuese e kësaj shume, rreth 43.5 milionë euro, janë pasuri të sekuestruara që presin vendimet përfundimtare. Raporti nxjerr në pah një sërë sfidash dhe nevojash për përmirësim të funksionimit të institucionit:

Hetimi i krimit të organizuar dhe korrupsionit – Retorika politike dhe mediatike mund të ndikojë në perceptimin publik dhe në autoritetin e SPAK, duke rritur kërcënimet nga krimi i organizuar. Ndërhyrjet me natyrë ligjore ose politike mund të rrezikojnë pavarësinë e institucionit.

Statusi i prokurorëve pas përfundimit të mandatit – Mospërcaktimi ligjor kërcënon vijimësinë e hetimeve dhe standardet profesionale.

Këshilltarët ligjor pranë SPAK – Mungesa e këshilltarëve me përvojë ndikon në cilësinë e hetimeve dhe ndjekjes së çështjeve deri në Gjykatën Kushtetuese.

Bashkëpunimi me institucionet publike – Nevojitet intensifikim i bashkëpunimit, sidomos me Policinë e Shtetit, për hetime më të koordinuara dhe efikase.

Sistemi i Menaxhimit të Çështjeve (Case Management System) – Konsolidimi i moduleve ekzistuese dhe integrimi i funksionaliteteve të reja mbetet prioritet për monitorim më të mirë të progresit të çështjeve.

Njësia e analizës – Ngritja e një strukture të specializuar për hetime komplekse dhe raportime ndërkombëtare kërkon bashkëpunim me ekspertë ndërkombëtarë.

Specialisti Ndërlidhës – Pozicioni aktual nuk përputhet plotësisht me funksionet e përcaktuara me ligjin, duke e bërë të nevojshme përcaktimin e qartë të kompetencave.

Shqyrtimi i kërkesave nga autoritetet e huaja – Mungesa e kompetencës për njohjen dhe ekzekutimin e vendimeve penale të huaja, përfshirë ekstradimin, pengon vijimësinë e hetimeve dhe bashkëpunimin ndërkombëtar.

Kompetenca e Gjykatave të Posaçme – Mungesa e kompetencës për ekzekutimin e vendimeve penale për subjektet e posaçme çon në trajtim nga gjykatat e juridiksionit të përgjithshëm, duke zgjatur procedurat.

Ekstradimi/deportimi i shtetasve shqiptarë – Megjithë përmirësimet me disa shtete, procesi mbetet sfidues dhe kërkon marrëveshje dypalëshe për ekzekutimin e vendimeve jashtë vendit.

Raporti i SPAK nënvizon se, pavarësisht sfidave, institucioni ka rritur ndjeshëm efektivitetin në hetimin e korrupsionit dhe krimit të organizuar, duke vendosur një standard të lartë për drejtësinë në Shqipëri.