Kryeministri Edi Rama ka zhvilluar një inspektim në segmentin e Korridori VIII në aksin Librazhd–Prrenjas, për të parë nga afër progresin e punimeve dhe situatën në zonat problematike të rrugës.

Vizita përfshiu edhe segmentin në Arrat e Gurres, ku më herët ndodhi shembja e një pjese të rrugës, duke shkaktuar bllokimin e qarkullimit për 11 ditë dhe shqetësime për banorët dhe drejtuesit e automjeteve.

Gjatë inspektimit, Rama zhvilloi një takim pune me drejtuesit e kompanisë që po kryen punimet në këtë zonë, ku u diskutuan:

sfidat teknike të ndërhyrjes në terrenin problematik,

afatet për përfundimin e punimeve,

masat e sigurisë për stabilitetin e rrugës.

Segmenti Librazhd–Prrenjas konsiderohet pjesë me rëndësi strategjike e korridorit, pasi lidh zonat juglindore të vendit dhe lehtëson qarkullimin e automjeteve të lehta dhe të rënda, duke ulur kohën e udhëtimit dhe rritur sigurinë rrugore.

Sipas burimeve nga takimi, kryeministri theksoi se siguria e qytetarëve dhe funksionaliteti i rrugëve mbeten prioritet i qeverisë, ndërsa kërkoi nga kompania ndërtuese përshpejtimin e punimeve dhe garantimin e cilësisë së investimit.

Ndërhyrjet në zonën e Arrave të Gurres synojnë rikthimin e plotë të qarkullimit normal dhe parandalimin e problemeve të tjera që mund të shkaktohen nga rrëshqitjet e tokës apo reshjet intensive.