Presidentja e Kosovës, Vjosa Osmani, ka njoftuar se ka nxjerrë dekretin për shpërndarjen e Kuvendi i Kosovës, duke i hapur rrugë mbajtjes së zgjedhjeve të reja parlamentare në vend.

Në një konferencë për media, Osmani deklaroi se vendimi vjen pasi përfaqësuesit e popullit vendosën një natë më parë që vendi të shkojë drejt zgjedhjeve të reja.

“Jam këtu para jush sepse përfaqësuesit e popullit mbrëmë vendosën që ta dërgojnë vendin në zgjedhje të reja. Kjo situatë ka qenë e evitueshme. Është fatkeqësi e madhe që ata nuk zgjodhën interesin e Kosovës”, u shpreh presidentja.

Ajo theksoi se, në përputhje me kompetencat e saj kushtetuese, ka marrë vendimin për shpërndarjen e parlamentit.

“Prandaj sot, në përputhje me kompetencat e mia kushtetuese, kam nxjerrë dekretin për shpërndarjen e Kuvendit”, deklaroi Osmani.

Me këtë vendim, Kosova hyn në një proces të ri zgjedhor, ndërsa institucionet pritet të ndjekin procedurat për caktimin e datës së zgjedhjeve dhe organizimin e procesit elektoral.