Kuvendi i Kosovës dështon të zgjedhë presidentin e ri, vendi rrezikon të shkojë drejt zgjedhjeve të reja parlamentare

Kuvendi i Kosovës ka dështuar të zgjedhë presidentin e ri për shkak të mungesës së kuorumit të nevojshëm në seancën plenare, duke e futur vendin në një situatë që mund të çojë drejt zgjedhjeve të reja parlamentare.

Në sallë ishin të pranishëm vetëm 66 deputetë, ndërsa përpara tyre u prezantuan dy kandidatë për postin e presidentit, të dy nga Lëvizja Vetëvendosje: Glauk Konjufca dhe Fatmire Kollçaku.

Kryetarja e Kuvendit, Albulena Haxhiu, u bëri thirrje disa herë deputetëve që mungonin të ktheheshin në seancë për të siguruar kuorumin e nevojshëm, por ata nuk iu përgjigjën thirrjes.

Pas prezantimit të kandidatëve, Haxhiu sqaroi se sipas Kushtetutës kërkohet prania e të paktën 80 deputetëve në sallë për të vazhduar me procedurën e votimit për presidentin e Kosovës.

“Me këtë rast nuk ka kuorum për të vazhduar më tutje me votimin. Disa herë në këtë seancë u bëra thirrje deputetëve që mungojnë të jenë të pranishëm në përputhje me Kushtetutën dhe aktgjykimet e Gjykatës Kushtetuese, por ata nuk janë këtu. Rrjedhimisht nuk i kemi dy të tretat e deputetëve”, deklaroi ajo.

Afati kushtetues për zgjedhjen e presidentit përfundoi mbrëmë në orën 23:59.

Sipas procedurës, për zhvillimin e seancës kërkohet prania e 80 deputetëve. Në dy raundet e para të votimit kandidati duhet të marrë 80 vota, ndërsa në raundin e tretë mjafton shumica e thjeshtë prej 61 votash për t’u zgjedhur president.

Në seancë morën pjesë deputetët e Lëvizjes Vetëvendosje dhe ata të Grupit Multietnik, ndërsa deputetët e opozitës munguan.

Ndërkohë, kryetarja e Kuvendit Albulena Haxhiu ka njoftuar se i janë drejtuar Gjykatës Kushtetuese për të kërkuar vlerësimin e kushtetutshmërisë së procedurës së zgjedhjes së presidentit.

Në një reagim në rrjetet sociale, ajo bëri të ditur se është kërkuar gjithashtu një masë e përkohshme për pezullimin e afatit kushtetues që lidhet me këtë procedurë, deri në publikimin e vendimit të Gjykatës.

“Sapo i jemi drejtuar Gjykatës Kushtetuese për vlerësimin e kushtetutshmërisë së procedurës për zgjedhjen e Presidentit të Republikës së Kosovës. Po ashtu kemi kërkuar vendosjen e një mase të përkohshme për pezullimin e afatit kushtetues që lidhet me këtë procedurë deri në publikimin e aktgjykimit”, ka shkruar Haxhiu.

Ajo shtoi se për këtë hap është njoftuar edhe presidentja e vendit, Vjosa Osmani.