Person i maskuar merr 120 mijë lekë në një pikë këmbimi valutor në Tiranë dhe largohet me motor

Një grabitje e dhunshme është regjistruar paraditen e sotme në zonën e “5 Majit” në Tiranë, ku një person ende i paidentifikuar ka marrë rreth 1.2 milionë lekë të vjetra (120 mijë lekë të reja) nga një pikë këmbimi valutor.

Sipas informacioneve, autori i maskuar ka hyrë në ambientet e pikës së këmbimit dhe, nën kërcënimin e një sendi në dukje armë zjarri, ka marrë shumën e parave nga punonjësit që ndodheshin brenda.

Ngjarja ka ndodhur rreth orës 09:10 te pika Western Union në qendrën tregtare Concord në rrugën 5 Maji në kryeqytet. Pas marrjes së parave, autori është larguar fillimisht me vrap nga vendngjarja dhe më pas është larguar me motor në rrugicat e zonës së “5 Majit”.

Policia bëri të ditur se pas marrjes së njoftimit, shërbimet kanë shkuar në vendngjarje, kanë bërë rrethimin e zonës dhe kanë ngritur pika kontrolli në akset rrugore përreth.

Aktualisht, forcat e policisë po vijojnë kontrollet dhe po krehin zonën për të bërë të mundur identifikimin dhe kapjen e autorit.

Ndërkohë, grupi hetimor po punon për sqarimin e plotë të rrethanave të ngjarjes.

Ky është momenti, kur ky person ende i paidentifikuar, nën kërcënimin e armës ka grabitur rreth 1.2 milionë lekë të vjetra (120 mijë lekë të reja) në një pikë këmbimi valutor në zonën e “5 Majit” në Tiranë.