Grabitet një pikë këmbimi valutor në Tiranë, autori u largua pas kërcënimit me armë

Një grabitje është regjistruar paraditen e sotme në Tiranë. Ngjarja ka ndodhur rreth orës 09:10 në rrugën “5 Maji”, brenda një qendre tregtare, te pika Western Union.

Sipas informacioneve paraprake, një shtetas ende i paidentifikuar, nën kërcënimin e një sendi në dukje armë zjarri (pistoletë), ka marrë një shumë parash në një pikë këmbimi valutor dhe më pas është larguar nga vendi i ngjarjes.

Menjëherë pas marrjes së njoftimit, shërbimet e Policisë kanë shkuar në vendngjarje, kanë bërë rrethimin e zonës dhe kanë ngritur pika kontrolli në akset rrugore përreth për të bërë të mundur kapjen e autorit.

Policia po vijon kontrollet dhe po kreh zonën për identifikimin dhe arrestimin e personit të dyshuar.

Ndërkohë, grupi hetimor po punon për sqarimin e plotë të rrethanave të kësaj ngjarjeje.