Kreu i SPAK-ut, Klodian Braho, për më shumë se katër orë ka raportuar në Bruksel përpara përfaqësuesve të Komisionit Evropian.

Burime nga Delegacioni i Shqipërisë në BE, në kushte anonimiteti, i thanë gazetarit të Top Channel, Muhamed Veliu, se Klodian Braho nuk ka qenë i vetëm në këtë “provim” të parë në Bruksel pas marrjes së detyrës.

Klodian Braho është ulur në të njëjtën tryezë, i shoqëruar nga disa hetues dhe këshilltarë ligjorë të BKH-së, njëra prej tyre Sadleva Bodo.

Ndërsa në të majtën e tij ka qëndruar Fabian Zhilla, shefi i kabinetit.

Të njëjtat burime treguan se kjo përballje e Klodian Brahos në Bruksel me Komisionin Evropian lidhej me raportimin e progresit të kapitujve 23 dhe 24 për Gjyqësorin dhe të Drejtat Themelore.

Numri një i SPAK-ut u është përgjigjur me detaje të gjitha pyetjeve të përfaqësuesve të DG ENEST-it, Drejtorisë së Përgjithshme për Zgjerimin dhe Fqinjësinë Lindore.

Detyra parësore e kësaj drejtorie në Komisionin Evropian është menaxhimi i çështjeve mes BE-së dhe vendeve kandidate.

Ajo monitoron hap pas hapi reformat për sundimin e ligjit, zhvillimet ekonomike dhe reformën në administratën publike.