Mali i Zi – Kombëtarja e vajzave e Shqipërisë ka nisur me fitore kualifikueset për Botërorin 2027, duke triumfuar në transfertë me rezultatin 1-2 ndaj Malit të Zi dhe duke marrë tre pikë shumë të rëndësishme.

Të dy golat për kuqezetat u realizuan nga kapitenia Megi Doçi, e cila shënoi fillimisht për barazim 1-1 dhe më pas eurogolin që vendosi rezultatin përfundimtar 1-2.

Trajneri Armir Grima luajti me këtë formacion titullar: Antigoni Hyska (GK), Klea Hamonikaj, Arbiona Bajraktari, Alma Hilaj, Arbenita Curraj, Ezmiralda Franja, Mikaela Metalla, Fortesa Berisha, Ilarja Zarka, Qëndresa Krasniqi dhe Megi Doçi.

Pjesa e parë përfundoi 0-0, ndërsa në pjesën e dytë vendaset kaluan përkohësisht në avantazh në minutën e 67-të. Barazimi erdhi tre minuta më pas me Doçin dhe avantazhi u vulos në minutën e 76-të, gjithmonë me gol të kapitenes shqiptare.

Kjo fitore tregon karakter, besim dhe dëshirë të madhe nga skuadra shqiptare.

Ndeshja e ardhshme e kualifikueseve do të luhet kundër Çekisë më 7 mars, në ora 18:00, në stadiumin “Loro Boriçi”. Hyrja do të jetë falas dhe ndeshja do të transmetohet nga FSHF TV.