Muxhahidinët e Shqipërisë dolën sot me një deklaratë mbi dyshimet se Irani mund të sulmojë me raketa kampin e tyre në Manzë.

Shahriar Kia, përfaqësues i muxhahidinëve në Manzë, në një deklaratë dërguar për noa.al thotë se "lajmet e publikuara nga Irani për mundësinë e një sulmi me raketa ndaj Ashraf 3 dhe mbulimi i tyre në disa media shqiptare janë thjesht propagandë e orkestruar nga regjimi iranian".

Kia thotë se kjo po bëhet për qëllime lufte psikologjike, me qëllim krijimin e shqetësimit dhe kaosit në Shqipëri, me qëllim ndjekjen e qëllimeve të veta.

Ai siguron se "këto pretendime nuk kanë bazë dhe nuk bazohen në asnjë fakt", ndërsa thekson:

"Kjo luftë propagande po kryhet në koordinim të ngushtë midis regjimit iranian dhe agjentëve të tij lokalë në Shqipëri, pikërisht për të rritur rezonancën dhe përhapjen e saj sa më shumë të jetë e mundur"

"Është e qartë dhe e pamohueshme se raketat e regjimit iranian nuk kanë kapacitetin teknik për të arritur në Shqipëri", përfundon deklarata e Shahriar Kia dërguar në redaksinë e noa.al.