Detaje të reja nga ngjarja në Tiranë, i dyshuari shpreh pendesë

Gazmend Buçpapaj, i arrestuar si i dyshuari për ngjarjen ku humbi jetën 31-vjeçari Egli Pashollari, nuk ka dhënë shpjegime për motivet gjatë marrjes në pyetje nga hetuesit.

Sipas burimeve, 40-vjeçari ka shprehur pendesë dhe ka kërkuar falje familjes së viktimës për humbjen e jetës së të riut, por nuk ka sqaruar arsyet që çuan në ngjarjen e rëndë.

Pas incidentit, i dyshuari u largua nga vendi i ngjarjes dhe u fsheh në një banesë në Tropojë. Ai u arrestua një ditë më parë nga forcat e policisë në këtë qytet.

Ngjarja ndodhi më 20 shkurt në zonën e ish-Parkut në Tiranë, ku 31-vjeçari mbeti i plagosur rëndë dhe më pas ndërroi jetë.

Hetimet vijojnë për të zbardhur plotësisht rrethanat dhe motivet e ngjarjes.