Më shumë se tre milionë dokumente janë deklasifikuar në kuadër të çështjes që lidhet me Jeffrey Epstein, një skandal që ka prekur nivele të larta brenda dhe jashtë Shteteve të Bashkuara.

Përtej akuzave të rënda për abuzim seksual ndaj të miturve, një pjesë e dokumenteve përmbajnë komunikime që lidhen me interesin e financierit për çështje që kanë të bëjnë me UFO-t dhe pretendimet për rrëmbime jashtëtokësore.

Sipas gazetarit dhe studiuesit spanjoll Javier Sierra, gjatë një transmetimi në programin Cuarto Milenio, është zbuluar një email i datës 26 shkurt 2018, drejtuar fizikanit teorik dhe kozmologut amerikan Lawrence Krauss.

Sipas raportimeve, në komunikim përmenden artikuj që kundërshtonin pretendimet për rrëmbime nga alienët, si dhe aludimet mbi përvojat pranë vdekjes apo fenomene të tjera paranormale. Po ashtu, pretendohet se Epstein ka ofruar mbështetje financiare për iniciativa që synonin trajtimin kritik të këtyre temave.

Sierra ka deklaruar se në dokumente gjenden edhe komunikime nga persona të interesuar për projekte mbi UFO-t, të cilët i drejtoheshin Epsteinit për financim. Megjithatë, sipas tij, dokumentacioni sugjeron se Epstein ishte më i prirur drejt qëndrimeve skeptike dhe mbështeste qasje që synonin diskreditimin e këtyre fenomeneve në sytë e publikut.

Çështja mbetet objekt analizash të mëtejshme, ndërsa dokumentet e deklasifikuara vijojnë të shqyrtohen nga mediat dhe studiuesit.