Konfindustria kërkon masa urgjente për tregun e karburanteve pas tensioneve në Gjirin Persik

Konfindustria i ka bërë thirrje qeverisë të ndërmarrë masa të menjëhershme ligjore për të mbrojtur ekonominë nga pasojat e paparashikuara të luftës në Gjirin Persik, me fokus të veçantë tregun e karburanteve.

Në një njoftim për shtyp, organizata thekson se ekzekutivi duhet të kontrollojë zbatimin e ligjit nga kompanitë e karburanteve për sigurimin e rezervës strategjike 3-mujore, si një garanci për stabilitetin e furnizimit në rast përshkallëzimi të krizës.

Gjergj Buxhuku, Administrator i Përgjithshëm i Konfindustrisë kërkon forcimin e mbikëqyrjes rregullatore në drejtim të konkurrencës në treg, për të shmangur rrezikun e spekulimeve me çmimet, një situatë e ngjashme me atë që u regjistrua gjatë krizës së luftës në Ukrainë në vitet 2021–2022.

Një tjetër kërkesë lidhet me përgatitjen e një pakete ligjore që do të mundësonte uljen e barrës fiskale në rast të rritjes së fortë të çmimeve të karburanteve në tregjet ndërkombëtare, me qëllim zbutjen e ndikimit te konsumatorët dhe bizneset.

Sipas Konfindustrisë, çmimi i naftës ka dhënë tashmë sinjale të menjëhershme rritjeje në bursë, duke e bërë të pashmangshme reflektimin e kësaj tendence edhe në tregun vendas. Organizata nënvizon se kohëzgjatja e konfliktit mbetet e paqartë, çka shton pasigurinë ekonomike.

Kërkesat:

Së pari, duhet kontrolluar zbatimi i ligjit në kompanitë e karburanteve për sigurimin e rezervës strategjike 3 mujore.

Së dyti, duhen marrë masat ligjore në drejtimin rregullator të konkurencës në treg për të shmangur rrezikun e rikthimit të spekullimeve të çmimit të karburanteve si në rastin e krizës së luftës në Ukrainë në vitet 2021-22.

Së treti, kërkojmë, që qeveria të përgatisi një paketë ligjore me synim uljen e barrës fiskale në rast të rritjes së fortë të çmimit të karburanteve në tregjet ndërkombëtare. /noa.al