Nxehtësia e shkarkimit do të shndërrohet në energji elektrike: Një fizikant ka patentuar shpikjen e tij!

Pedagogu i Departamentit të Fizikës në Fakultetin e Shkencave Themelore në Universitetin Teknik të Gebzes në Turqi, Dr. Mahmut Aksit, thotë se me fletën termoelektrike nano-qeramike që kanë zhvilluar synojnë të shndërrojnë në energji elektrike nxehtësinë që humbet në automjete.

“Në automjetet tona, 70% e energjisë termike humbet si mbetje,” tha ai.

Teknologjia e patentuar është licencuar për prodhim industrial dhe është projektuar të përdoret në burime të nxehtësisë së mbetur, veçanërisht në sistemet e egzozit.

U bë e ditur se është marrë patenta për fletët termoelektrike nano-qeramike të zhvilluara nga dr. Aksit, të cilat synojnë të shndërrojnë në energji elektrike nxehtësinë e mbetur që çlirohet në mjedis. Teknologjia synon të reduktojë humbjet duke kthyer drejtpërdrejt nxehtësinë e mbetur në energji elektrike.

“E arritëm për herë të parë në botë”

Sipas gazetës Türkiye që citon noa.al, Aksit tha se kanë licencuar dy patenta njëherësh dhe se materiali i zhvilluar prej tyre e shndërron drejtpërdrejt energjinë termike në energji elektrike.

Teknologjia, e prodhuar në formë flete nga materiale nano-qeramike, përbën një risi për herë të parë në botë.

“Kemi arritur të prodhojmë një fletë që qëndron vetë me strukturën e saj mekanike, pa pasur nevojë për veshje mbi ndonjë material tjetër. Këtë e kemi arritur për herë të parë në botë,” tha ai.

“70% e nxehtësisë në automjete është humbje”

Aksit u shpreh: “70% e energjisë termike në automjetet tona humbet si mbetje. Për të shndërruar të paktën një pjesë të saj në energji elektrike, nevojiten materiale termoelektrike. Fletët termoelektrike që kemi prodhuar do t’i shërbejnë pikërisht këtij qëllimi.”

Jo vetëm për automjete: edhe për termocentrale dhe furra industriale

Shpikja nuk është e kufizuar vetëm në sektorin e automjeteve. Dr. Aksit tha se edhe në termocentrale dhe në furrat industriale një pjesë e madhe e energjisë humbet pa u përdorur, ndërsa përfitimi kryesor i kësaj teknologjie është ulja e këtyre humbjeve.