Nga dyshimet për negociatat bërthamore te urdhri në bord gjatë fluturimit Air Force One: si u mor vendimi i Trump për të goditur Iranin

Nga MEG KINNARD dhe DAVID KLEPPER për AP. Përktheu dhe redaktoi noa.al

Presidenti Donald Trump deklaroi të premten pasdite në Shtëpinë e Bardhë se nuk ishte i kënaqur me mënyrën se si po ecnin bisedimet bërthamore me Iranin.

Tre orë më vonë, ai dha urdhrin për nisjen e operacionit që do të eliminonte shumë prej drejtuesve më të lartë të vendit, përfshirë Udhëheqësin Suprem Ajatollah Ali Khamenei dhe disa krerë të lartë ushtarakë.

Kështu u zhvillua operacioni:

12:25 pasdite (EST): Trump largohet nga Shtëpia e Bardhë për në Teksas dhe u thotë gazetarëve për negociatat indirekte me Iranin: “Nuk jam i kënaqur me mënyrën si po shkojnë.”

I pyetur nëse kishte marrë një vendim përfundimtar, ai përgjigjet: “Jo, nuk e kam.”

3:38 pasdite (EST): Ndërsa udhëtonte me Air Force One drejt Teksasit, Trump jep urdhrin për nisjen e operacionit me emrin “Epic Fury”.

“Presidenti dha urdhrin: ‘Operacioni Epic Fury miratohet… fat të mbarë’,” tha gjenerali Dan Caine, kryetar i Shefave të Shtabit të Përbashkët, gjatë një konference për shtyp të hënën.

Sipas Caine, ky urdhër aktivizoi të gjitha elementet e forcave të përbashkëta amerikane. Bateritë e mbrojtjes ajrore u përgatitën, pilotët dhe ekuipazhet provuan për herë të fundit planet e goditjes, ndërsa grupet e aeroplanmbajtëseve Lincoln dhe Ford u zhvendosën drejt pikave të nisjes. Ekuipazhet nisën ngarkimin përfundimtar të armëve dhe furnizimeve.

Gjatë fluturimit treorësh drejt Corpus Christi, Trump diskutoi me një grup të vogël ligjvënësish republikanë që udhëtonin me të për mundësinë e sulmit. Debati u fokusua mes vazhdimit të negociatave apo ndërhyrjes ushtarake. Sipas një burimi me njohuri direkte, shumica mendonte se Irani po i përdorte bisedimet për të fituar kohë.

Në avion ndodheshin senatorët e Teksasit John Cornyn dhe Ted Cruz, si dhe disa anëtarë republikanë të Dhomës së Përfaqësuesve.

4:03 pasdite (EST): Trump mbërrin në Teksas dhe u përgjigjet gazetarëve në Portin e Corpus Christi. Ai përsërit se nuk është i kënaqur me negociatat, por nuk zbulon se operacioni tashmë ishte miratuar.

28 shkurt 2026

1:15 pas mesnate (EST): Sipas kronologjisë së paraqitur nga Caine, operacioni nis realisht.

“Forcat amerikane në tokë, ajër, det dhe hapësirën kibernetike dhanë goditje të koordinuara për të çrregulluar dhe shkatërruar aftësinë e Iranit për të zhvilluar operacione luftarake,” tha ai.

Operacioni përfshiu mijëra ushtarakë nga të gjitha degët, qindra avionë luftarakë të gjeneratës së katërt dhe të pestë, dhjetëra avionë furnizimi me karburant, si dhe dy grupet e aeroplanmbajtëseve.

CIA kishte punuar prej muajsh për të gjurmuar lëvizjet e udhëheqjes iraniane, përfshirë Khamenein. Inteligjenca u nda me Izraelin dhe koha e sulmit u rregullua sipas këtyre të dhënave.

Në Teheran dëgjohen shpërthime, ndërsa ministri izraelit i Mbrojtjes shpall gjendje emergjente.

Tre goditje në tre lokacione të ndryshme brenda një minute vranë Khamenein dhe rreth 40 figura të larta, përfshirë komandantin e Gardës Revolucionare dhe ministrin e Mbrojtjes.

4:37 pasdite (EST): Trump njofton në Truth Social se Khamenei është vrarë, duke thënë se ai nuk arriti t’i shmangej “sistemeve tona të sofistikuara të inteligjencës dhe gjurmimit”.

1 mars 2026

12:21 pasdite (EST): Trump deklaron se forcat amerikane kanë “shkatërruar dhe fundosur 9 anije luftarake iraniane” dhe se selia e marinës iraniane është “shkatërruar kryesisht”.

4:06 pasdite (EST): Në një video-mesazh, Trump thotë se SHBA dhe partnerët e saj goditën qindra objektiva në Iran brenda pak minutash, përfshirë objektet e Gardës Revolucionare dhe sistemet e mbrojtjes ajrore.

Ai shton se sulmet do të vazhdojnë derisa “të arrihen të gjitha objektivat”, pa i specifikuar ato.

Zyrtarë të administratës informojnë në seanca private në Kongres se inteligjenca amerikane nuk tregonte se Irani po përgatitej për një sulm të menjëhershëm ndaj SHBA-së, por pranonin ekzistencën e një kërcënimi të përgjithshëm nga raketat dhe forcat aleate të Iranit në rajon.

2 mars 2026

8:00 paradite (EST): Sekretari i Mbrojtjes Pete Hegseth deklaron se SHBA nuk është e përfshirë në një mision për ndërtim shteti në Iran dhe se kjo nuk do të jetë një luftë e pafundme.

“Kjo nuk është Irak. Kjo nuk është e pafundme,” tha ai.

Po të hënën, Trump deklaron se operacioni mund të zgjasë 4–5 javë, por shton se SHBA ka kapacitet ta zgjasë shumë më tepër.

Në një intervistë për New York Post, ai nuk përjashton dërgimin e trupave tokësore nëse “do të ishte e nevojshme”.

Ndërkohë, vendet e rajonit morën masa mbrojtëse. Emiratet e Bashkuara Arabe njoftuan se kanë interceptuar 9 raketa balistike, 6 raketa lundruese dhe 148 dronë. Katari tha se ka rrëzuar dy avionë iranianë.

Çmimi i naftës u rrit ndjeshëm për shkak të frikës për ndërprerje furnizimi në Ngushticën e Hormuzit. Tregjet globale reaguan me rënie, ndërsa kontratat e ardhshme në SHBA ndoqën trendin negativ të Evropës dhe Azisë.

Foto: AP