Pas ndryshimeve në qeveri, Kryeministri Edi Rama do të mbledhë sot, në orën 09:00, Kryesinë e Partia Socialiste e Shqipërisë.

Në fokus të mbledhjes do të jetë caktimi i datës së Asamblesë së PS-së. Ky takim i socialistëve vjen pak ditë pas mbledhjes së Grupit Parlamentar të PS-së, ku u kryen ndryshime të mëdha në qeveri, si edhe shkarkimi nga detyra i Belinda Ballukut, e cila mbante postin e zëvendëskryeministres dhe ministres së Infrastrukturës dhe Energjisë. Ajo është vënë zyrtarisht nën akuzë nga SPAK për abuzime me tendera, ndërsa është kërkuar edhe arrestimi i saj.

Gjatë ditës së djeshme, Presidenti i Republikës, Bajram Begaj, priti në takim Kryeministrin Rama. Takimi u zhvillua në Pallati i Brigadave, ku kreu i qeverisë paraqiti propozimet për ndryshimet në kabinetin qeveritar dhe dorëzoi për dekretim shkarkimet dhe emërimet e reja. Takimi zgjati rreth 40 minuta.

Procedura kushtetuese parashikon një afat prej 7 ditësh për dekretimin e shkarkimeve dhe emërimeve të reja, të cilat më pas kalojnë për votim në Parlament. Për miratimin e tyre nevojiten 71 vota. Pas votëbesimit në Kuvend, ministrat e rinj betohen para Presidentit për të marrë detyrën.

Shkarkimet dhe emërimet u njoftuan në mbledhjen e përbashkët të Grupit Parlamentar të PS-së me kabinetin qeveritar, të mbajtur më 26 shkurt. Rama vendosi të zëvendësojë Belinda Ballukun me Albana Koçiun në postin e zëvendëskryeministres, ndërsa ajo do të lërë drejtimin e Ministrisë së Brendshme.

Ministrinë e Infrastrukturës dhe Energjisë pritet ta drejtojë Enea Karakaçi, i cili deri më tani ka mbajtur postin e Drejtorit të Operatorit të Shpërndarjes së Energjisë Elektrike.

Ndërkohë, Elisa Spiropali do të zëvendësohet në krye të Ministrisë së Punëve të Jashtme nga diplomati i karrierës Ferit Hoxha, i cili ka shërbyer më herët si ambasador në OKB dhe në BE.

Toni Gogu do të drejtojë Ministrinë e Drejtësisë, në vend të Besfort Lamallarit, i cili rikthehet në Ministrinë e Brendshme si drejtues i saj.

Deputetja e qarkut të Vlorës, Erjona Ismaili, do të drejtojë Ministrinë për Marrëdhëniet me Parlamentin.

Ndërsa ministri i Mbrojtjes, Pirro Vengu, zëvendësohet nga Ermal Nufi, i cili aktualisht mban detyrën e zëvendëssekretarit të Përgjithshëm të Kryeministrisë.