Në minierën e Trepça, punëtorët e galerisë së 11-të kanë nxjerrë një kristal të madh dhe të rrallë, pjesë e masivit që përmban pirit dhe galenit.

Shefi i shërbimit gjeologjik, Xhemajl Tupella,ka theksuar përkushtimin e punëtorëve, të cilët, pavarësisht peshës së rëndë, e kanë bërë kristalin të gatshëm për transport.

“Ky kristal është nxjerrë nga punëtorët e horizontit të 11-të, përkatësisht nga punishtja 151/A. Ai karakterizohet nga disa zgavra natyrore. Gjatë punimeve është hasur dhe është nxjerrë si pjesë e masivit që përmban pirit, galenit dhe është i mbuluar me kalcit të bardhë. Përmasat e tij janë rreth 1,40 metra i lartë dhe 1,20 metra i gjerë”, tha Tupella.

Ai shtoi se punëtorët e ndërrimit të tretë, pavarësisht peshës së madhe, arritën ta nxjerrin kristalin.

“Është interesant fakti që ka peshë të madhe, por punëtorët e zellshëm të ndërrimit të tretë e nxorën dhe e bënë të gatshëm për transport përmes vagonetave, lokomotivës dhe korpës. Nuk ishte e lehtë, por me shumë përkushtim ia dolën”, u shpreh ai përmediet kosovare.

Kristali i nxjerrë dëshmon pasurinë minerare të Trepçës dhe përkushtimin e punëtorëve në kryerjen e detyrës së tyre.