Lindja e Mesme në flakë: Rritet numri i viktimave, ja sa persona kanë humbur jetën në secilin vend

Pas sulmeve të SHBA-së dhe Izraelit ndaj Iranit, konflikti është përhapur në të gjithë Lindjen e Mesme. Sulmet dhe kundërsulmet mes palëve kanë sjellë rritje të ndjeshme të viktimave, si civile ashtu edhe ushtarake.

Sipas të dhënave të publikuara nga autoritetet zyrtare dhe mediat shtetërore, bilanci i viktimave deri pasditen e së hënë paraqitet si më poshtë:

Iran: 555 të vdekur

Gjysmëhëna e Kuqe iraniane njoftoi se 555 persona kanë humbur jetën nga sulmet e kryera në territorin iranian. Sipas mediave shtetërore, të paktën 165 persona u vranë nga një sulm ndaj një shkolle fillore për vajza. Autoritetet raportojnë se sulmet kanë prekur 131 zona të banuara. Nuk ka të dhëna të detajuara për numrin e të plagosurve.

Izrael: të paktën 10 të vdekur

Shërbimi kombëtar i emergjencës “Ylli i Kuq i Davidit” njofton se të paktën 10 persona kanë humbur jetën dhe mbi 200 janë plagosur që nga nisja e operacioneve ushtarake kundër Iranit. Nëntë viktima u regjistruan në qytetin Beit Shemesh, pasi një raketë goditi një strehë.

Liban: 31 të vdekur

Ministria e Shëndetësisë e Libanit deklaroi se sulmet ajrore izraelite në jug të vendit dhe në Bejrut kanë shkaktuar të paktën 31 viktima. Më vonë sonte u raportua se ky numër mund të jetë rreth dy herë më i lartë.

Irak: 4 të vdekur

Grupi paraushtarak i mbështetur nga Irani, “Forcat e Mobilizimit Popullor”, njoftoi se një nga selitë e tij u godit nga një sulm i përbashkët SHBA–Izrael, duke lënë katër të vrarë.

Emiratet e Bashkuara Arabe: 3 të vdekur

Ministria e Mbrojtjes e Emirateve konfirmoi se tre persona humbën jetën nga sulmet hakmarrëse iraniane.

Kuvajt: 3 ushtarë amerikanë të vrarë

Komanda Qendrore e SHBA-së njoftoi se tre ushtarë amerikanë kanë humbur jetën në Kuvajt gjatë zhvillimeve të fundit. Më vonë sonte u njoftua dhe për tre ushtarë të tjerë amerikanë të vdekur.

Bahrein: 1 i vdekur

Sipas mediave shtetërore të Bahreinit, një person humbi jetën pasi mbetjet e një rakete të neutralizuar shkaktuan zjarr në një anije të huaj pranë zonës industriale Selman.

Sulmet vazhdojnë në disa vende të rajonit dhe ka shqetësime se numri i viktimave mund të rritet. Deklaratat nga palët e përfshira tregojnë se konflikti nuk është më i kufizuar vetëm mes Iranit dhe Izraelit, por është shtrirë në një pjesë të gjerë të Lindjes së Mesme.