Presidenti Erdogan: Prioriteti ynë është të arrijmë një armëpushim dhe të hapim derën për dialog

Presidenti i Turqisë, Recep Tayyip Erdogan, ka reaguar ashpër për situatën në Iran, duke shprehur dhimbje të thellë për vuajtjet e civilëve dhe duke bërë thirrje për ndalimin urgjent të luftimeve.

Duke folur në Ankara, Erdogan theksoi se janë civilët, veçanërisht fëmijët, ata që po paguajnë çmimin më të rëndë të konfliktit. Deklarata vjen pasi 555 iranianë janë konfirmuar të vdekur, pjesa më e madhe fëmijë dhe familjarë.

"Fatkeqësisht, me provokimet e Izraelit, i cili lulëzon me gjak dhe kaos, mosmarrëveshja u përshkallëzua në një konflikt të nxehtë. Vëllezërit dhe motrat tona në Gjirin Persik janë prekur gjithashtu negativisht nga hakmarrjet e ndërsjella."

“Ne ndajmë dhimbjen e popullit iranian. Është e dhimbshme të shohësh civilë dhe fëmijë të pafajshëm që mbajnë barrën e kësaj përplasjeje,” deklaroi ai.

Kreu i shtetit turk njoftoi se Ankaraja do të shtojë përpjekjet diplomatike për të arritur një armëpushim sa më të shpejtë dhe për të hapur rrugën e dialogut.

Do t’i intensifikojmë kontaktet tona në të gjitha nivelet derisa të vendoset një armëpushim dhe të rivendoset qetësia në rajonin tonë. Jemi në anën e paqes. Duam që gjakderdhja të ndalet dhe që rajoni ynë të gjejë stabilitetin që e ka kërkuar prej kohësh,” u shpreh Erdogan.

Ai paralajmëroi se nëse konflikti nuk frenohet, pasojat mund të jenë të rënda jo vetëm për sigurinë rajonale, por edhe për atë globale.

“Askush nuk mund të përballojë pasigurinë ekonomike dhe gjeopolitike që mund të sjellë një përshkallëzim i tillë. Ky zjarr duhet të shuhet para se të përhapet më tej,” theksoi presidenti turk.

Konflikti u përshkallëzua pasi SHBA dhe Izraeli ndërmorën një ofensivë të gjerë kundër Iranit, duke vrarë disa drejtues të lartë iranianë, përfshirë Udhëheqësin Suprem, Ajatollah Ali Khamenei. Në përgjigje, Teherani ka nisur sulme me raketa dhe dronë ndaj Izraelit dhe vendeve të rajonit ku ndodhen baza dhe asete amerikane.