Shkuan në Dubai për përvjetorin e martesës, por u përballën me bombardimet: “Thjesht duam të kthehemi te fëmijët”

Ajo që duhej të ishte një udhëtim romantik për 20-vjetorin e martesës, u kthye në një përvojë të frikshme për Sarah Mettee dhe bashkëshortin e saj nga Nashville, SHBA.

Çifti kishte zgjedhur Dubain për disa ditë pushimi dimëror larg tre fëmijëve të tyre, por situata në rajon ndryshoi papritur pas nisjes së sulmeve mes SHBA-së, Izraelit dhe Iranit.

Në vend të relaksit në diell, Mettee tha për NBC News se kishte “parë dhe dëgjuar shumë raketa”, disa prej të cilave u interceptuan pranë hotelit ku po qëndronin. “Ishte e tmerrshme,” u shpreh ajo. Për arsye sigurie, emri i hotelit nuk u bë publik, pasi aty po qëndrojnë shumë turistë amerikanë.

Tani, ashtu si qindra mijëra udhëtarë të tjerë në Lindjen e Mesme, ajo është e bllokuar në rajon. Fluturimet janë pezulluar pasi Irani ndërmori sulme hakmarrëse ndaj disa vendeve fqinje, përfshirë Emiratet e Bashkuara Arabe, pas bombardimeve amerikano-izraelite që çuan në vrasjen e liderit suprem iranian.

“E prisnim me padurim këtë udhëtim. Nuk ishte i lirë dhe ishte diçka që nuk e kishim bërë kurrë më parë vetëm të dy,” tha ajo nga hoteli.

Mettee, 45 vjeç, mbërriti në Dubai të hënën e kaluar dhe tani shqetësohet se mund të kalojnë disa ditë para se të rikthehet te tre fëmijët e saj, 16, 9 dhe 8 vjeç, në Nashville.

Ministria e Mbrojtjes e Emirateve tha se mbrojtja ajrore ka interceptuar 165 raketa balistike, dy raketa lundruese dhe mbi 540 dronë iranianë gjatë dy ditëve.

Sipas Mettee, Ambasada Amerikane u ka kërkuar qytetarëve të qëndrojnë të strehuar dhe ajo nuk ka dalë nga hoteli që prej asaj kohe. Ajo ka provuar të rezervojë disa fluturime për t’u larguar sa më shpejt, por të gjitha janë anuluar.

“Thjesht duam të kthehemi te fëmijët,” tha ajo, duke shtuar se familjarët po kujdesen për ta, por ajo druhet se mund të kalojnë “10, 12 apo 14 ditë” pa i parë.

Dubai International Airport, qendra më e ngarkuar ndërkombëtare në botë, ishte mbyllur për të tretën ditë radhazi, megjithëse pritej të rihapej në mbrëmje. Autoritetet raportuan dëme në aeroport dhe katër punonjës të plagosur. Po ashtu u raportua zjarr në Portin Jebel Ali, një nga nyjet kryesore të transportit detar.

Pamje në rrjetet sociale treguan flakë pranë hotelit të famshëm Burj Al Arab dhe tym pranë rrokaqiellit Burj Khalifa. U raportua gjithashtu një shpërthim pranë hotelit Fairmont në ishullin artificial Palm Jumeirah.

Alex Bocquet, një sipërmarrës 30-vjeçar që jeton në Dubai prej më shumë se një viti, tha se dëgjoi një shpërthim të fuqishëm pranë Fairmont. “Gjithmonë jam ndjerë i sigurt këtu, por këtë herë ishte shumë afër,” tha ai. Ai dhe miqtë e tij vendosën të largohen nga qyteti drejt shkretëtirës, ku kishin marrë me qira një shtëpi.

“Dubai dukej si epiqendra e kërcënimeve iraniane,” tha ai, duke shtuar se mendon se qyteti u shënjestrua për shkak të rëndësisë së tij turistike.

Për Mettee, prioriteti mbetet kthimi në shtëpi. Ajo tha se sulmet ndaj aeroportit e bëjnë të pasigurt edhe idenë e fluturimit. “Nuk dua të jem në ajër nëse po sulmojnë aeroportin,” tha ajo.

Fëmijët e saj janë në dijeni të situatës dhe e dinë që prindërit do të kthehen sapo të jetë e mundur. Djali i madh, 16 vjeç, sipas saj, po e përballon situatën me qetësi.

“Është shumë i qetë dhe i matur,” tha ajo.