Presidenti iranian ka dënuar ashpër goditjet ndaj shkollave dhe spitaleve, për të cilat fajëson forcat amerikane dhe izraelite.

“Sulmimi i spitaleve është sulm ndaj vetë jetës. Sulmimi i shkollave është goditje ndaj së ardhmes së një kombi”, shkroi Presidenti Masoud Pezeshkian në një postim publik.

“Shënjestrimi i pacientëve dhe fëmijëve është shkelje e hapur e parimeve humanitare. Bota duhet ta dënojë këtë. Unë qëndroj pranë kombit tim në zi. Irani nuk do të heshtë dhe nuk do t’u nënshtrohet këtyre krimeve”, shtoi ai.

Bilanci i viktimave nga sulmi izraelit ndaj një shkolle në jug të Iranit rritet në 165

Numri i të vdekurve nga sulmi izraelit që goditi një shkollë fillore për vajza në Minab, në provincën Hormozgan në jug të Iranit, ka arritur në 165 persona, sipas mediave shtetërore iraniane.

Prokurori lokal i Minabit, i cituar nga agjencia IRNA, deklaroi se edhe 96 persona të tjerë janë plagosur nga goditja ndaj shkollës “Shajareh Tayyebeh”, gjatë ofensivës së gjerë amerikano-izraelite të nisur të shtunën në mëngjes.

Ky sulm është pjesë e një vale bombardimesh të përbashkëta SHBA-Izrael në territorin iranian, që kanë nxitur përshkallëzim të dhunës në rajon.

Ministri i Jashtëm i Iranit, Abbas Araghchi, publikoi një foto nga vendngjarja, duke deklaruar se shkolla për vajza u shkatërrua dhe se u vranë “fëmijë të pafajshëm”.

“Këto krime ndaj popullit iranian nuk do të mbeten pa përgjigje”, shkroi Araghchi në një postim në platformën X.

Edhe zëdhënësi i Ministrisë së Jashtme iraniane, Esmaeil Baghaei, e dënoi sulmin si një “krim të hapur” dhe i bëri thirrje Këshillit të Sigurimit të OKB-së të ndërmarrë veprime.

Ndërkohë, agjencia iraniane Mehr raportoi se të paktën dy nxënës u vranë në një tjetër sulm izraelit që goditi një shkollë në lindje të Teheranit.