Kryeministri i Kosovës, Albin Kurti, deklaroi se zgjedhja e presidentit kërkon një shumicë më të gjerë sesa minimumi formal kushtetues, në mënyrë që të shmanget rreziku i zgjedhjeve të reja parlamentare.

Sipas tij, prania dhe vota e çdo deputeti është vendimtare për procesin, duke theksuar se edhe një mungesë e vetme mund ta rrëzojë votimin dhe ta çojë vendin automatikisht në zgjedhje.

“Nuk mund të shkojmë me 80 vetë në udhëtim e në fund të dalë 79, sepse menjëherë shkojmë në zgjedhje”, u shpreh ai.

Kreu i ekzekutivit shtoi se objektivi i shumicës është të sigurohen rreth 84–85 vota, në mënyrë që procesi të jetë i qëndrueshëm dhe të mos varet nga mungesat eventuale të deputetëve.

Ai bëri të ditur se komunikimet dhe takimet mes partive politike po vazhdojnë pikërisht për këtë arsye, duke e cilësuar shmangien e zgjedhjeve si “prioritet absolut”.

Megjithatë, Kurti nuk dha një përgjigje konkrete lidhur me mundësinë e kandidimit të presidentes aktuale, Vjosa Osmani.

Sipas tij, diskutimet ndërmjet subjekteve politike kanë qenë konstruktive, por ende nuk kanë prodhuar hapa konkretë, ndërsa theksoi se mundësitë për arritjen e një marrëveshjeje ekzistojnë dhe nuk është e domosdoshme që vendi të shkojë në zgjedhje të parakohshme.