SOFJE – Boksierja kosovare, Donjeta Sadiku, ka shënuar një sukses historik duke fituar medaljen e artë në edicionin e 77-të të kampionatit ndërkombëtar "Strandja 2026", që u zhvillua në Sofje të Bullgarisë. Në finalen e kategorisë deri në 60 kg, Sadiku mposhti boksieren braziliane Rebeca De Santos pas një përballjeje tejet intensive.

Dominimi i boksieres kosovare u konfirmua nga vlerësimi i jurisë, ku pas tre raundeve të forta, tre nga pesë gjyqtarët i dhanë avantazhin Sadikut me rezultatet 29-28 dhe 30-27. Ky triumf bën që Donjeta Sadiku të mbrojë me sukses titullin e fituar vitin e kaluar, duke u konfirmuar si një nga emrat më të rëndësishëm të boksit amator në arenën ndërkombëtare.

Rrugëtimi i saj drejt të artës ishte i padiskutueshëm. Përpara finales, ajo eliminoi në gjysmëfinale egjiptianen Ayyad Yomna, ndërsa në fazat paraprake shënoi fitore bindëse 5-0 ndaj çekes Barbora Maxova dhe ukrainases Veronika Korets.

Turneu "Strandja" konsiderohet si më i vjetri dhe ndër më prestigjiozët në Evropë, duke mbledhur elitën botërore të boksit. Me këtë fitore të dytë radhazi, Donjeta Sadiku lartëson sërish flamurin e Kosovës, duke u bërë sportistja e parë nga vendi që arrin të dominojë këtë kompeticion për dy vite rresht.