Tiranë- Një lajm i dhimbshëm vjen nga radhët e infermierëve. Është ndarë nga jeta në moshën 39-vjeçare infermieri Erald Samarxhi, duke lënë pas pikëllim të thellë te familjarët, kolegët dhe të gjithë ata që e njohën.

Prej shumë vitesh ai shërbeu si infermier në Spitalin Infektiv pranë Qendra Spitalore Universitare "Nënë Tereza", ku u dallua për profesionalizëm, përkushtim dhe korrektësi në raport me pacientët dhe stafin mjekësor. Të afërmit dhe bashkëpunëtorët e përshkruajnë si një djalë shembullor, të dashur dhe gjithmonë të gatshëm për të ndihmuar.

Kontributi i tij ishte veçanërisht i çmuar gjatë periudhës së pandemisë, kur ai u angazhua në vijën e parë të shërbimit, por edhe në çdo rast tjetër kur qytetarët kishin nevojë për kujdes shëndetësor.

Në një reagim publik, Shoqata e Infermierëve të Shqipërisë shprehu ngushëllimet më të sinqerta për familjen, kolegët dhe miqtë e të ndjerit, duke vlerësuar figurën dhe kontributin e tij në shërbim të shëndetit publik.

“Pushofsh në paqe, koleg”, thuhet në mesazhin përkujtimor.