Prishtinë, 26 shkurt 2026 – Ambasadori i Bashkimit Europian në Kosovë, Aivo Orav, u takua sot me Glauk Konjufcën, zëvendëskryeministër i parë dhe ministër i Punëve të Jashtme dhe Diasporës, për të diskutuar mbi rrugën e Kosovës drejt integrimit në BE.

Sipas njoftimit të Zyrës së BE-së, në takim u diskutua për përshpejtimin e reformave dhe avancimin e prioriteteve kyçe që lidhen me procesin e integrimit europian.

Orav theksoi se ky është një moment i rëndësishëm për Kosovën për të ecur përpara në rrugën e saj europiane, duke nënvizuar nevojën për angazhim të vazhdueshëm politik dhe progres konkret në përmbushjen e standardeve të BE-së.

Ai shprehu gjithashtu vlerësimin e Bashkimit Europian për përafrimin vullnetar të Kosovës me Politikën e Përbashkët të Jashtme dhe të Sigurisë të BE-së, veçanërisht për mbështetjen ndaj Ukrainës në kushtet e tensioneve gjeopolitike aktuale.

Takimi rikonfirmoi angazhimin e BE-së për të mbështetur Kosovën në procesin e integrimit dhe për të thelluar bashkëpunimin në kuadër të agjendës europiane.