SKRAPAR – Aksi rrugor që lidh Skrapar me Përmet ka pësuar dëmtime të konsiderueshme si pasojë e rrëshqitjes së dheut.

Sipas informacioneve paraprake, në zonën e fshatit Rog Çepan, në afërsi të Përmetit, asfalti është çarë dhe një pjesë e mirë e trupit të rrugës është shembur. Si pasojë, hyrja drejt qytetit të Skraparit është bllokuar prej rreth tre orësh.

Situata është përkeqësuar edhe nga rrëshqitja e masivëve shkëmborë në segmentin rrugor, duke krijuar pasiguri për qarkullimin e automjeteve.

Autoritetet lokale dhe shërbimet përkatëse ndodhen në terren dhe po punojnë për pastrimin e inerteve dhe hapjen e aksit rrugor, ndërsa drejtuesve të mjeteve u bëhet thirrje të shmangin lëvizjen në këtë segment deri në stabilizimin e plotë të situatës.