Tiranë, 25 shkurt 2026– Ambasadori i Bashkimit Europian në Shqipëri, Silvio Gonzato, ka zhvilluar një takim me dy bashkëkryetarët e Komisionit të Posaçëm Parlamentar për Reformën Zgjedhore, Damian Gjiknuri dhe Oerd Bylykbashi.

Në fokus të diskutimeve ka qenë ecuria e reformës zgjedhore dhe hapat që pritet të ndërmerren në javët në vijim. Sipas ambasadorit Gonzato, proceset zgjedhore të besueshme dhe në përputhje me standardet ndërkombëtare mbeten prioritet kyç në rrugën e Shqipërisë drejt anëtarësimit në Bashkimi Europian.

Ai theksoi rëndësinë e reformës për rritjen e transparencës në financimin e partive politike, garantimin e pavarësisë së administratës zgjedhore dhe parandalimin e keqpërdorimit të burimeve shtetërore gjatë fushatave elektorale.

Në deklaratën e tij, Gonzato nënvizoi se një reformë e gjerë e rregullave zgjedhore, që përfshin edhe zbatimin e rekomandimeve të OSBE/ODIHR, është thelbësore për të garantuar besimin e publikut dhe për të mbrojtur integritetin e zgjedhjeve të ardhshme.

Takimi vjen në një klimë të tensionuar politike në vend, ku opozita ka nisur protesta, duke kërkuar dorëheqjen e kryeministrit Edi Rama dhe krijimin e një qeverie teknike.