Në portin më të madh në vend është emëruar Zëvendës Drejtori i Përgjithshëm i Autoritetit Portual Durrës.

Deri tani ky post, siç mëson “DurrësLajm” nuk ekzistonte prej disa vitesh, pasi ish-drejtori Pirro Vengu e pati hequr nga organograma e APD.

Zv/drejtori i ri i APD-së është Rubin Rredhi, 24 vjeç.

Emërimi i tij është bërë nga Ministrja e Infrastrukturës dhe Energjisë, Belinda Balluku.

Nuk dihen eksperiencat e tjera profesionale të zv/drejtorit Rredhi, të cilit i besohet një detyrë shumë e rëndësishme, në një moshë kaq të re.

Sot, pasi delegacioni i KFOR vizitoi Portin e Durrësit, sipas një njoftimi zyrtar të APD, thuhet se u prit nga Zëvendës Drejtori i Përgjithshëm i Autoritetit Portual Durrës, z. Rubin Rredhi, i cili prezantoi zhvillimet kryesore të portit, funksionimin e terminaleve dhe kapacitetet logjistike që ofron infrastruktura portuale aktuale.