Një kamion i ngarkuar me gurë është përmbysur në anë të rrugës në zonën e Porto Romano, në Durrës, duke krijuar rrezik për qarkullimin e automjeteve.

Sipas informacioneve paraprake, mjeti ka humbur qëndrueshmërinë gjatë lëvizjes dhe është përmbysur, ndërsa një pjesë e ngarkesës ka përfunduar në rrugë. Fatmirësisht, drejtuesi i kamionit nuk ka pësuar dëmtime.

Gurët e ngarkuar në kamion ishin të përmasave të mëdha dhe janë rrëzuar në rrugë siç shihet edhe nga pamjet e portalit lokal DurrësLajm, çka mund të sillte pasoja të rënda për jetën e njerëzve.

Ngjarja ka shkaktuar vështirësi të përkohshme në qarkullim, ndërsa në vendngjarje kanë mbërritur shërbimet përkatëse për të bërë të mundur largimin e mjetit dhe pastrimin e segmentit rrugor.