Ka nisur zyrtarisht mëngjesin e kësaj të mërkure puna për demontimin e urës së Dragostunjës, në vendin e quajtur “Arrat e Gurrës”, në aksin kombëtar Librazhd–Prrenjas, pasi struktura u dëmtua rëndë nga rrëshqitja dhe fundosja e tokës.

Ura pësoi dëmtime të pakthyeshme pas një lëvizjeje të fuqishme të masivit të dheut, e cila destabilizoi themelet dhe e bëri të pamundur çdo ndërhyrje riparuese. Specialistët në terren konfirmuan se zhvendosja e trupit të rrugës dhe çarja e shtresave mbajtëse e kanë nxjerrë jashtë funksioni strukturën ekzistuese, duke e kthyer atë në një rrezik potencial për qarkullimin dhe sigurinë publike.

Procesi i demontimit po kryhet me mjete të rënda dhe nën masa të rrepta sigurie, për shkak të paqëndrueshmërisë së terrenit. Zona vijon të konsiderohet me risk të lartë gjeologjik, ndërsa lëvizjet e tokës raportohen ende aktive në disa segmente përreth.

Shembja e urës në Dragostunjë ka thelluar krizën e qarkullimit në këtë arterie të rëndësishme lidhëse, duke izoluar përkohësisht komunitete të tëra dhe duke devijuar trafikun në rrugë alternative rurale, të cilat nuk përballojnë fluksin e lartë të automjeteve.

Autoritetet pritet të hartojnë një projekt të ri për ndërtimin e një strukture më të qëndrueshme dhe të përshtatur me kushtet gjeologjike të zonës. Ndërkohë, banorët kërkojnë transparencë për afatet e ndërhyrjes dhe garanci për një zgjidhje afatgjatë, në mënyrë që të rikthehet normaliteti në një nga segmentet më problematike të qarkut.