24 shkurt 2026 – Apeli i Posaçëm do të shqyrtojë sot, në orën 11:00, kërkesën e Veliajt për zëvendësimin e masës së sigurimit “arrest me burg” me një tjetër masë, më të butë.

Seanca do të zhvillohet para gjyqtares Nertina Kosova në Apelin e Posaçëm dhe është përqendruar në vlerësimin nëse janë përmbushur kushtet ligjore për ndryshimin e masës së sigurisë.

Veliaj ka ankimuar vendimin e datës 1 shkurt të gjyqtares Etleva Deda, e cila la masën e arrestit me burg në fuqi, duke kërkuar zëvendësimin e saj me një masë më të butë, përfshirë edhe garanci pasurore.

Në kërkesën e tij, kryebashkiaku ka argumentuar se masa e arrestit është e padrejtë, duke theksuar se nuk i është njohur e drejta për mbrojtje efektive, pasi ende nuk është njoftuar me dosjen hetimore. Ai ka refuzuar edhe mbrojtjen e caktuar nga gjykata, duke pretenduar se kjo avokate nuk ka njohje reale të dosjes dhe nuk përfaqëson strategjinë e tij të mbrojtjes.

Veliaj ndodhet në arrest me burg që nga 10 shkurti 2025, kur u urdhërua masa e sigurisë nga Prokuroria e Posaçme Anti-Korrupsion dhe Krim i Organizuar (SPAK), ndërkohë që vetëm disa muaj më parë çështja u kalua për gjykim. SPAK ka ngritur ndaj tij 13 akuza, përfshirë korrupsion pasiv, pastrim parash, mosdeklarim pasurie, shpërdorim detyre dhe futje të sendeve të ndaluara në qeli.

Edhe bashkëshortja e tij, Ajola Xoxa, akuzohet nga SPAK për korrupsion pasiv në disa raste, si dhe për pastrim parash, mosdeklarim pasurie dhe fshehje të të ardhurave.

Apeli i Posaçëm do të vendosë nëse Veliaj mund të lirohet nga burgu nën masa alternative deri në zhvillimin e gjykimit.