Një shtetas turk, 31 vjeç, i shpallur në kërkim ndërkombëtar nga Austria për veprën penale “Prodhim dhe shitje e narkotikëve”, është arrestuar në pikën kufitare të Morinë, në hyrje të Republikës së Shqipërisë.

Arrestimi u krye nga shërbimet e Policisë Kufitare Morinë, në bashkëpunim me DVP Kukës, si rezultat i kontrolleve me përzgjedhje dhe verifikimeve të imtësishme në hyrje/dalje të territorit, me qëllim goditjen e paligjshmërive në kufi dhe kapjen e shtetasve të shpallur në kërkim.

Nga verifikimet e kryera në bashkëpunim me Interpol Tirana rezultoi se shtetasi me inicialet V. B., banues në Stamboll, ishte shpallur në kërkim ndërkombëtar. Ndaj tij, Gjykata e Vjenës në Vjenë kishte caktuar masën e sigurisë “Arrest në burg” për veprën penale të prodhimit dhe shitjes së lëndëve narkotike.

Interpol Tirana, në bashkëpunim me autoritetet austriake, po vijon procedurat për ekstradimin e 31-vjeçarit drejt Austrisë.