Valon Berisha po ngiste makinën direkt përpara automjetit të aksidentuar dhe u bë dëshmitar okular i incidentit

Një ngjarje e rëndë ka tronditur mesfushorin shqiptar të FC Zürich, Valon Berisha, pasi kushëriri i tij 38 vjeçar ka humbur jetën në një aksident rrugor në Austri.

Sipas raportimeve, aksidenti ndodhi në autostradën Westautobahn, kur furgoni me të cilin udhëtonte 38-vjeçari doli nga rruga dhe u përplas ballë për ballë me një barrierë druri.

Berisha, i cili po udhëtonte me një automjet që ndodhej përpara, e ka parë ngjarjen në pasqyrën e pasme dhe është ndalur menjëherë për të dhënë ndihmën e parë, së bashku me disa kalimtarë të tjerë.

Pavarësisht përpjekjeve të ekipit të emergjencës, viktima u shpall i vdekur në vendngjarje.

Në një reagim zyrtar, FC Zürich shprehu tronditjen për humbjen tragjike, duke theksuar se lojtari nuk ishte i përfshirë drejtpërdrejt në aksident, por ishte dëshmitar i ngjarjes.

Klubi zviceran ka shprehur mbështetjen e plotë për Berishën dhe familjen e tij, duke u zotuar se do ta ndihmojë mesfushorin në këtë moment të vështirë personal.

Deklaratë për media e FC Zurich

FC Zurich është thellësisht i tronditur nga një aksident tragjik në Austri, në të cilin një i afërm i ngushtë i lojtarit tonë Valon Berisha humbi jetën.

Vetë Valon Berisha nuk ishte i përfshirë në aksident, por iu desh të ishte dëshmitar i ngjarjes. Në këtë situatë jashtëzakonisht të rëndë, ngushëllimet tona më të sinqerta shkojnë për familjen dhe të gjithë të afërmit.

FC Zurich qëndron pranë Valon Berishës në këtë periudhë të vështirë dhe e mbështet atë në çdo aspekt.

Nga respekti për privatësinë e familjes, kërkojmë mirëkuptimin tuaj që nuk do të bëjmë komente të tjera përtej kësaj deklarate.

***

Valon Berisha sapo ishte transferuar nga LASK te FC Zürich gjatë merkatos së dimrit dhe të shtunën në mbrëmje zhvilloi paraqitjen e tij të parë si titullar në fitoren 2-1 ndaj Grasshoppers Zürich