Prokuroria e Posaçme kundër Korrupsionit dhe Krimit të Organizuar njoftoi se Gjykata e Posaçme e Shkallës së Parë për Korrupsionin dhe Krimin e Organizuar ka shpallur fajtor ish-policin Gentjan Hoxhalli për veprën penale “Korrupsioni pasiv i personave që ushtrojnë funksione publike”.

Gjykata e dënoi atë me 3 vite burgim, dënim që u ul në 2 vite për shkak të gjykimit të shkurtuar. Ekzekutimi i dënimit u pezullua dhe i pandehuri u vu në provë për 4 vite. Po ashtu, atij iu hoq e drejta për të ushtruar funksione publike për 5 vite.

Njoftimi i plotë:

“Prokuroria e Posaçme kundër Korrupsionit dhe Krimit të Organizuar ka paraqitur pranë Gjykatës kërkesën me objekt: ‘Gjykimin e çështjes penale në ngarkim të të pandehurit Gentjan Hoxhalli, i akuzuar për kryerjen e veprës penale ‘Korrupsioni pasiv i personave që ushtrojnë funksione publike’, parashikuar nga neni 259, paragrafi i dytë, i Kodit Penal’.

Gjykimi i kësaj çështjeje u zhvillua me rregullat e gjykimit të shkurtuar. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar, me trup gjykues të përbërë nga gjyqtarët Irena Gjoka, Engjëllushe Tahiri dhe Besmir Stroka, me vendimin nr. 18, datë 23.02.2026, vendosi:

Deklarimin fajtor të të pandehurit Gentjan Hoxhalli për kryerjen e veprës penale ‘Korrupsioni pasiv i personave që ushtrojnë funksione publike’, parashikuar nga neni 259 i Kodit Penal, dhe dënimin e tij me 3 (tre) vite burgim.

Në aplikim të nenit 406 të Kodit të Procedurës Penale, uljen me 1/3 të dënimit dhe dënimin përfundimtar me 2 (dy) vite burgim.

Në aplikim të nenit 59 të Kodit Penal, pezullimin e ekzekutimit të dënimit me burgim dhe vënien në provë për një afat prej 4 (katër) vitesh, me kusht që gjatë kësaj kohe të mbajë kontakte të rregullta me Shërbimin e Provës dhe të mos kryejë vepër tjetër penale.

Në aplikim të nenit 35, paragrafi 2, të Kodit Penal, heqjen e së drejtës për të ushtruar funksione publike për një periudhë prej 5 (pesë) vitesh.

Bazuar në nenin 261/1, germa ‘b’, në lidhje me nenin 389 të Kodit të Procedurës Penale, shuarjen e masës së sigurimit ‘Arrest në burg’, caktuar ndaj të pandehurit me vendimin nr. 116, datë 08.11.2025.

Urdhërohet lirimi i menjëhershëm i tij, nëse nuk mbahet i ndaluar, i arrestuar apo i dënuar për një vepër tjetër penale.

Në lidhje me provat materiale, gjykata, bazuar në nenin 190 të Kodit të Procedurës Penale, disponon kthimin e tyre të pandehurit.

Shpenzimet procedurale dhe gjyqësore i ngarkohen të pandehurit.

Kundër këtij vendimi lejohet ankim brenda 15 (pesëmbëdhjetë) ditëve në Gjykatën e Posaçme të Apelit për Korrupsionin dhe Krimin e Organizuar, duke filluar nga dita e nesërme e njoftimit të vendimit.”