Më shumë se tre vite pas vdekjes në aksident të Lucio Panziera-s, ngjarje e ndodhur në Montebelluna më 1 shtator 2022, gjykata është thirrur të përcaktojë përgjegjësitë e M.S., një shtetas shqiptar i akuzuar për incidentin. Fatale rezultoi përplasja mes makinës dhe skuterit të 52-vjeçarit, i cili po kthehej në shtëpi nga puna.

Mediat italiane që citon noa.al raportuan sot se ka nisur procesi gjyqësor ndaj emigrantit shqiptar M.S., 55 vjeç, i mbrojtur nga avokatët Fabio Capraro dhe Mauro Bonato.

Si ndodhi ngjarja

Një përplasje mes skuterit të tij dhe një Mercedesi nuk i la asnjë shans për të mbijetuar. Kështu humbi jetën Lucio Panziera, 52 vjeç, këshilltar bashkiak i Volpago del Montello, viktimë e një aksidenti rrugor të ndodhur rreth orës 18:00 të datës 1 shtator 2022 në Montebelluna.

Atë ditë Panziera po udhëtonte me motorin e tij kur u përplas me një Mercedes CLS të drejtuar nga 55-vjeçari, i cili po lëvizte në drejtim të qendrës së qytetit. Pas përplasjes me skuterin, makina vazhdoi lëvizjen duke humbur kontrollin deri sa përfundoi pranë një shtylle ndriçimi. 52-vjeçari u hodh mbi asfalt, mes karrexhatës dhe trotuarit. Në vendngjarje ndërhynë mjeku dhe infermierët e shërbimit emergjent 118, por përpjekjet për ta rikthyer në jetë rezultuan të kota: plagët e marra nga përplasja dhe rënia ishin shumë të rënda. Drejtuesi i Mercedesit u ndihmua në vendngjarje, por nuk kishte dëmtime që kërkonin transport në spital.

Sipas ekspertizës së kryer për aksidentin tragjik, Panziera, i cili punonte si magazinier në një kompani të zonës dhe atë mbrëmje po kthehej në shtëpi ku e prisnin bashkëshortja Francesca dhe dy vajzat e tyre, ishte ndalur duke pritur që një makinë tjetër të kthente majtas. M.S. ndodhej menjëherë pas tij dhe e ka gjetur përpara pa mundur ta shmangë përplasjen.