LIBRAZHD – Autoriteti Rrugor Shqiptar ka vendosur bllokimin e plotë të aksit rrugor Librazhd–Prrenjas, për shkak të rrezikut të shembjes së një ure në zonën e njohur si “Arrat e Gurrës”.

Sipas kreut të ARRSH-së, situata është përkeqësuar ndjeshëm gjatë 48 orëve të fundit, duke e bërë të pamundur vijimin e qarkullimit, edhe për mjetet e lehta. Ai sqaroi se struktura e urës ka pësuar zhvendosje të vazhdueshme, ndërsa betoni në pjesën e poshtme po degradohet.

“Prej javësh e kemi mbajtur në monitorim, por ditët e fundit ka pasur përkeqësim të dukshëm. Në orët e mëngjesit zhvendosja ishte 27 metra, aktualisht ka arritur në 29 metra. Poshtë urës betoni po thërrmohet, ndaj jemi të detyruar të bllokojmë totalisht trafikun”, u shpreh ai.

Autoritetet theksojnë se aktualisht nuk mund të jepet një afat i saktë për rihapjen e rrugës, pasi ndërhyrja do të nisë menjëherë dhe do të vlerësohet në terren shkalla e dëmtimit.

ARRSH u bën thirrje drejtuesve të mjeteve të shmangin këtë segment rrugor, pasi ekziston rreziku i krijimit të radhëve të gjata dhe bllokimit të qarkullimit. Sipas të dhënave paraprake, shkaqet e dëmtimit lidhen me faktorë natyrorë, pasi zona konsiderohet ujëmbajtëse dhe me lëvizshmëri të lartë të tokës.