Kanë dalë detaje të reja nga ngjarja që tronditi pasdrekën e sotme zonën rezidenciale të Delijorgjit në Tiranë.

I plagosur në këtë ngjarje ka mbetur Akil Koxhaxhiku, 34 vjeç me banim në Tiranë, raporton noa.al.

Autor i dyshuar i ngjarjes është identifikuar Besian Ferrazini. Ai është shpallur në kërkim dhe policia thotë se është në ndjekje të tij.

"Autori i ngjarjes jashtë një lokali te Kompleksi Delijorgji dyshohet shtetasi Besjar Ferazini. Hetimet e para sugjerojnë se ngjarja ndodhi nën dyshimet për xhelozi", thanë për noa.al burime nga policia.

Hetimi nxori se sot rreth orës 15:50, në Rrugën e Kavajës, tek zona e pallateve Delijorgji, dyshohet se gjatë një konflikti është plagosur në bark, me armë zjarri shtetasi Akil Koxhaxhiku, 34 vjeç, i cili ndodhet në spital, jashtë rrezikut për jetën.

Ndërkaq, grupi hetimor po vijon punën për sqarimin e rrethanave të krimit dhe dokumentimin e plotë ligjor të tij si dhe për identifikimin e shtetasve të tjerë të dyshuar të përfshirë në ngjarje.

Dyshimet e para janë se krimi ndodhi te një bar restorant për motive të dobëta. Akili ishte me partneren e tij duke drekuar.

Dyshohet se ka pasur një debat mes të plagosurit dhe të dyshuarit për hedhje fjalësh apo ngacmimeve ndaj të fejuarës.

Në një moment situata ka precipituar dhe i dyshuari ka nxjerrë një armë zjarri që duket se kishte me vete duke e plagosur në bark me një plumb, Akilin 34 vjeçar.

Në një tension të momentit, e fejuara e tij ka arritur të gjejë forca për të ndihmuar Akilin që ta dërgojë në urgjencës mjekësore dhe me makinë e ka transportuar drejt një spitali privat.