Një 42-vjeçar nga qyteti i Skraparit dyshohet se i ka dhënë fund jetës, duke u vetëhedhur në lumë.

Ngjarja mendohet se ka ndodhur mbrëmjen e djeshme, në vendin e quajtur “Ura e Blezënkës”, në afërsi të Kanioneve të Osumit në Skrapar. Por asnjë gjurmë e të humburit nuk është gjetur deri tani.

Në vendngjarje, u gjetën një motorr me të cilin ai lëvizte, disa sende personale dhe celulari i tij.

Pas këqyrjes së celularit të 42-vjeçarit është gjetur edhe mesazhi i tij i fundit, të cilin ia kishte dêrguar të vëllait, duke i thënë se po hidhej në lumë.

Ilir Kurti punonte si roje në një hidrocentral në Skrapar. Ai kishte qënë i martuar me një shtetase rumune, me të cilën kishte bërë edhe një djalë, por 7 vite më parë ata ishin ndarë.

Ish-bashkëshortja e tij ishte larguar drejt shtetit rumun dhe që prej asaj dite Iliri nuk e kishte takuar më djalin dhe as kishte folur më me të.

Sipas familjarëve, ai ishte mbyllur prej muajsh në vetvete dhe po e vuante mjaft largimin nga djali.

Burimet policore bëjnë me dije se paraprakisht dyshohet se ky shtetas të jetë hedhur në lumë, ndaj po vijojnë kërkime për gjetjen e tij si dhe për dokumentimin e plotë të rrethanave të rastit.