Endrit Nika dënohet me 18 vjet burg për vrasjen e të dashurës së tij argjentinase

Endrit Nika, i akuzuar për vrasjen e të dashurës së tij argjentinase, Maria Clara Urdangaray, është dënuar me 18 vjet burgim.

Sipas aktgjykimit, Nika akuzohet se nga kati i gjashtë i një hoteli në Fushë Kosovë e ka hedhur të dashurën e tij. Në dosje thuhet se ai ka nxjerrë kornizën e dritares dhe e ka shtyrë viktimën nga dritarja e dhomës së hotelit, duke bërë që ajo të pësojë lëndime të rënda trupore. Pavarësisht trajtimit mjekësor, ajo ka ndërruar jetë në Qendrën Klinike Universitare të Kosovës (QKUK).

Në shpalljen e aktgjykimit ishin të pranishëm prokurori Armend Hamiti, avokati i të akuzuarit Drilon Imeri, familjarët e viktimës si dhe familjarët e të akuzuarit.

Më 28 maj 2025, Nika nuk i kishte pranuar akuzat e Prokurorisë lidhur me këtë vepër penale, duke deklaruar: “Jam 100% i pafajshëm”.

I akuzuari kishte paraqitur versionin e tij të ngjarjes edhe në seancat e 22 janarit 2026 dhe 3 shkurtit 2026.

Rasti është gjykuar nga trupi gjykues i përbërë nga Gazmend Bahtiri, kryetar i trupit gjykues, si dhe anëtarët Gzim Ademi dhe Alltëne Murseli.

Më 15 shkurt 2026, KALLXO.com publikoi një hulumtim lidhur me këtë rast, ku trajtohej edhe çështja e një shume prej 50 mijë eurosh të përmendur në dosjen e aktakuzës. Sipas publikimit, në pamje dhe audio-incizime flitej për negociata që synonin lirimin nga aktakuza të Endrit Nikës. Në hulumtim u prezantuan prova që pretendonin se një zyrtar i Policisë kishte qarkulluar paratë e familjes së të dyshuarit tek avokatët.

Sipas aktakuzës së 11 shkurtit 2025, Endrit Nika akuzohet se më 1 gusht 2023, në hotel “Sonoma” në Fushë Kosovë, pas një mosmarrëveshjeje paraprake me të dashurën e tij, M.K.U., fillimisht e ka goditur vazhdimisht dhe ka tentuar ta shkelë me veturë në parkingun jashtë hotelit. Më pas, pasi janë kthyer në dhomën e hotelit ku po qëndronin, ai dyshohet se ka vazhduar përleshjen dhe goditjet ndaj saj, duke e çuar në një qoshe të dhomës nga ku ajo nuk kishte mundësi të largohej. Sipas aktakuzës, nga goditjet dhe shtyrjet e bëra, Nika ka nxjerrë kornizën e dritares dhe e ka hedhur viktimën nga kati i gjashtë. Si pasojë, ajo ka pësuar lëndime të rënda trupore dhe, pavarësisht trajtimit mjekësor, ka ndërruar jetë në QKUK.

Për këto veprime, Prokuroria e akuzon Endrit Nikën për veprën penale të vrasjes së rëndë.